BASTA! (di Turi Lima)

Questa poesia,del poeta siciliano indipendentista Turi Lima,l'avevo già postata,ma una carissima amica del blog l'ha richiesta come commento al mio post "Io siciliano.....". Invece,l'immagine è ripresa dal blog http://laurentius.ilcannocchiale.it/ .
Orazio Vasta
__________________________
Basta ccu li catini nta li pedi
e li càuci dati nta la facci.
Basta ccu Verri e Murri di Lavrianu
ca la me' terra tutta si spurparu.
Basta ccu li finici,
rumani, grechi, saracini e svevi,
basta ccu li burbuni e li taliani
c' asciugaru lu sangu a la me genti,
ca mi mannaru n-guerra,
ca mi luvaru l' aria ca rispiru,
ca mi tineru chiusu nta lu scuru.
Basta ccu li nirbati nta lu cori
e basta ccu li falsi prutizioni,
basta ccu li scaciuni e li pirsicuzioni.
Basta ccu li lusinghi,
basta ccu stu distinu
di pòpulu mischinu
ca si fa fari abusi senza fini
e pècura si fa pi cu' non vali,
pi cu' maltratta e sputa
supra lu nostru onuri.
Basta ccu lu duluri.
Basta ccu l' emigranti,
ccu mafia e ccu briganti,
basta ccu cu' ni voli addinucchiati.
Basta ccu cu' va appressu a lu tirannu
e nfanga la me' terra
di quannu chista è terra.
Pi curpa vostra razzi di pòpuli sarvaggi
lu me pòpulu tènunu affamatu
e schiavi pi tri sordi n' ha vinnutu.
Basta ccu li caìni,
servi di li nurmanni,
di grechi e di rumani,
burbuni e taliani.
Basta ccu li tiranni !
Vogghiu Sicilia nova,
unni travagghiu e ciuri
crìsciunu n-paci, nzèmula all' onuri,
unni non ci su' Crispi tradituri,
unni li figghi mei
diciunu forti
sugnu sicilianu.
Vogghiu la libbirtà.