"Luttamu 'ppi l'Autonumia Siciliana "

Ricevo da laquestionesiciliana.blogspot.com e pubblico...

A nuatri pari impurtanti diri chi li Diputati dâ Assimblea Reggiunali Siciliana, ‘nta chista lèggislatura,vosiru fari arreri ‘a Cummissiuni Parramintari ppi ‘a Riforma dû Statutu Spiciali d’ Autonomia.

Ni dumannamu allura: Picchì?

‘Ppi capiri ‘sta dicisiuni avemu a pinsari chi ‘u nostru Statutu e’, ‘ntu quatru puliticu e Istituzziunali ‘talianu, unicu e sulu.

Chistu fattu ni parra dû Status nazziunali sicilianu.

Ricurdamuni, dunca, cû nostru statutu e’ ‘na vera Costituzziuni.Nuddu s’avi a scurdari chi e’ ‘n jocamu ‘u futuru nostru.

Nuatri hamu a diri ca òj cu voli “rifurmari” ‘u nostru Statutu ammeci voli solu arrubbari i nostri diritti.Dunca ‘u nostru pariri ‘su ‘sta dicisiuni e’ negativu.

Stanno pruvannu ‘a Mburdirini . E di ‘stu “omicìdiu” puliticu-istituzziunali sunnu compriçi tutti li partita ‘taliani e puru, bbona, i partiti autonumisti.

Avemu allura a diri e scriviri ca tutti chisti, ‘mprima si fannu eliggiri pî difinniri a Sicilia e li Siciliani e doppu si vinnunu ‘u Statutu ca e’ a nostra “ Magna Charta”.

Fannu li brasi.

Quannu ci cunvieni si buccazziarianu comu difinsuri dâ Sicilia e doppu a pugnalanu. Bbi, chi sunnu bravi!

E nuatri avissimu agghiuttiri?

Certu chisti cuntanu supra u fattu chi li jurnala, li tilivisiuni òj sunnu parti dû sistèma di putiri. Iddi vulissiru allura ca nuatri stessimo zitti e muti.

L’opposizziuni òj semu sulu nuatri, sulu nuatri dicemu a i Siciliani comu sunnu li cosi e sulu nuatri difinnemu ‘a viritati e ‘a Justizzia.

Picchì s’avi a diri e abbanniari chi òj e’ ‘n piriculu ‘a democrazìa.

N’hannu a diri picchì fussi utili , necissariu farini abbabbalucchiri.

Picchì avemu a cridiri chi si ‘ni facemu arrubbari i nostri Diritti ( òj difinnuti ntû Statutu dû 1946) avissimu essiri cchiù democratici?

‘A viritati e’ chi ni vonnu fricari.Chisti sunnu tra iddi tutti amiciuzzi e parrucciani. Chisti nun hannu propriu dicoru e hannu ammeci ‘a facci di corìu.

Faccioli e farsi, tempu arreri, ‘ntu Parramentu Sicilianu pruvaru, ammucciuni ammucciuni, a fricarini tirannu fori l’agghi e vulennu canciddaru ‘u Statutu.Hamu a diri chi tannu ‘nu giuvani Diputatu, ‘nu Sicilianu onestu e curaggiusu i sputtanau tutti.

Ora pirò chisti pruvanu arreri a fari fora ‘a nostra Autonumia comu vonnu i patrona continentali, i pupari di iddi.

Puru stavota hamu a firmari ‘stu schifiu.

Ni vadi di li Diritti Cumunitari di tuttu ‘u nostru Populu, speci di chiddi ca stanno peju ntâ nuatri.Cu voli “ammazzari” ‘u nostru Statutu voli puru vinniri ‘a Sicilia e li Siciliani pî favuriri u Putiri,e ntâ Sicilia i so’ gruppi e curdati di galuppina.

‘U nostru e’ ‘nu Raggiunamentu, ‘nu studiu dî la realtati.Hamu allura a capiri chi stavota chisti nun ponnu attaccari u sceccu unni vonnu e tuttu attamaci. Hamu a fari accussì ppi nun chianciri poi amari lacrimi a cosi cunsati.

Facemu pulitica, divintamu Nuatri Oppusizziuni suciali, popolari siciliana e democratica. Finemula , puru ntû sicilianismu, di farini cannuliari da certi Rivoluzziunari câ scazzetta, chi nun quagghianu e fannu quagghiari.

‘U nostru pariri e’chi òj nuatri nun putemu cchiù farini arrubbari u nostru futuru.Futuru ca dipinni da li diritti ca putemu e sapemu aviri e difinniri.

Nuatri dicemu No a ‘u prugettu di Cuntra-riforma statutaria.

‘Na dicisiuni, ‘n ordini chistu chi veni a li ascari siciliani da li so’ patroni du Cuntinenti.

A chisti òrdini oppunemu u nostru NO.

E dicemu NO picchì nuatri nun avemu scurdatu dunni veni a origini dû Statutu, dâ nostra Autonumia.

‘Stu Statutu fu scrittu cû lu sangu di li figghi, li frati e li soru dâ Sicilia.

Cû lu sangu di chiddi ca ‘nta l’anni quaranta du vintesimu seculu paharu pî tutti nuatri u prezzu cchiù granni: ‘a Vita.

Picchì accussì nuatri, tutti i Siciliani, ajèri, òj e dumani, putissimo essiri libbiri , filici e viviri ‘nta Justizzia.

Ppi ‘stu fattu dunca nuatri nun putemu , nun duvemu e nun vulemu farini scippari ‘a nostra Liggi Principali: u nostru Statutu.Statutu, Autonumia ca signa, ‘nta nostra Sicilia, u veru accuminciari dâ Democrazìa.

Dumannamuni allura: Picchì assai genti abbrama cuntra a nostra Autonumia ?

Picchì dicemulu o chisti hannu i so’ cavigghieddi di gruppu o pirsunali o picchì li cunvinceru di essiri ‘taliani e propriu fôru educati a schifiari u fattu di essiri e sintirisi siciliani. Comu si iddi nun facissiru parti di ‘stu Populu anticu e gluriusu ca vivi ‘nta u centru du Mediterraneu, ca e’ centru dû Mediterraneu.Arrivau pirò u tempu di vinciri ‘sta alienazziuni pulitica e culturali.

Comu putemu fari?

Dapprincìpiu n’hamu a cunvinciri chi sulu cû li mezzi justi putemu arrinesciri a vinciri ‘a nostra lotta.E òj u megghiu mezzu e’ propriu u Statutu.Nun e’ ‘nu casu ca u putiri puliticu cû e pî mezzu dî so’ ascari siciliani tiniu ‘a nostra Autonumia ntâ ‘n agnuni.Usannula sulu quannu ci sirviu ppi ingranniri i so’ privilèggi e tenenu a u chiaccu chiddi parti du Statutu chi ammeci putianu serviri a libbirari i Siciliani, tutti i Siciliani puru dâ puvirtà.Dunca òj doppu chi trattaru u Bbeni Cumuni comu robba soi, pirsunali ‘sti ascari, di centru, di destra e di manca, ora vonnu scaricari supra a nostra Autonumia ‘u schifiu, ‘u scialibbiu chi iddi e i so’ parrucciani ficiru.Arrivau u tempu di diri BBASTA, nun ‘ni putemu cchiù !

‘Mprima chisti ‘ntu Statutu ci assupparu ‘u panuzzu e poi ‘u schifiaru.Vinni dunca u tempu di difinniri u dirittu dû nostru Populu a l’avviniri, ppi nuatri comu pî i novi generazziuni. Pî fari ‘sta cosa hamu a addifinniri a nostra Autonumia.

E’ ‘na battàgghia ntâ cui nun si poti ristari neutrali. Avemu, Aviti a dicidiri da chi parti vuliti stari: o cuntra o a favuri dâ Sicilia.
T R I N A K R I U S