"su' tutti morti ccà, fantàsimi..." (di Turi Lima)

FORSI
di Turi Lima
Forsi tu campi, ancora. Forsi
dintra la grutta di l' ànima, pi tia
vòlanu ancora lòdani e carànnuli¹;
forsi supra li mura-sciara di la to' vita
affittata a jurnata, ancora, vidi
crìsciri macchi di girànii chi lustrìanu
nta lu scuru di notti ccu li jorna ritagghiati.
Eppuru, tra li ncagghi di sti prèuli
c' hanu grappa di vitri acculurati,
nchiostru di nùvuli annirìca
lu passu d' un dumani senz' occhi
e pinni di jacobbu² càscanu
supra nidi di rìnnini³:
ci sunu manu
ccu jita longhi comu ràdichi di cerza
chi tantìanu casi,
n-cerca di porti spalancati a lu suli
p' addinticari cori.
Comu pagghia a lu ventu, comu petra
ca la china arruzzola intra a un fossu di limarra,
Tu sfuji di lu to' stissu pettu
e resti - nudu - a cuntari
soni di campani muti
e ciàvuri di ciuri mai sbucciati.
Tuttu chiddu chi tocchi e jisi àvutu
supra altari di fumu, àutru non è
chi cìnniri di tombi ca ti sutterra
e ti riporta a un nenti.
Forsi TU cridi ancora d' èssiri vivu
ma la Sicilia
affunna intra a un mari di mafia
e non c' è un jitu di figghiu
chi m' aiuta a ncagghiarla a lu me' cori:
su' tutti morti ccà, fantàsimi
chi bàllanu ognunu la so' danza,
pistannu fumalori e campanari,
mentri la terra mia
figghia gramigna e làcrimi.

NOTE
¹) allodole e calandre
²) gufo
³) rondini
****************
La foto della bandiera siciliana capovolta non è un fotomontaggio(by A RARIKA)