"Sunò lu cornu Eunu..."(da "Cca ogni petra è",di Turi Lima)

CCA OGNI PETRA E'

di Turi Lima
No. Non vogghiu stari
immòbili a guardàriti,
mentri li spaddi ti si ncùrvanu
sutta lu pisu di li misèrii.
Tu, giùvini ca passi li to' jorna
arriminannu pinni d' aceddi morti
nta lu saccu acculuratu di li minzogni,
tu non sai di quantu chiantu
è fattu lu Calvariu di Sicilia,
serva affamata e misa a vìnniri li so' carni
nudi
pi li banchini di li porti.
Tu non sai di li suspiri
jittati di matri vìduvi
tra pàmpini d' aranci e violi e grutti
straziati di suli e friddu; tu non sai
di gridi d' òmini, macinati di la raggia,
all' ùmmira di tiranni; tu non canusci
lu scuru di li notti - stiddati di duluri -
di cu' vosi spizzari li catini
e truvò lami e focu e ancora curri,
nudu e dispiratu, tra celi e nferni,
a ricampari ànimi
assicutati di scantu e di fami.
Sunò lu cornu Eunu
e ancora pi li strati
l' omu camina mpintu a lu juvu
e sbatti lu campanu.
Cca ogni petra è un chiantu,
ogni chiantu è un ciuri, ogni ciuri
è na spina, ogni spina
è na lancia chiantata nta lu cori:
ogni cori è carni scippata a sta terra
ca batti, pàlpitu pi pàlpitu,
n-sintunia ccu la me ànima,
ca voli amuri, ca voli giustizia.
No.
Non vogghiu stari immòbili
a vidìriti ncagghiatu
sutta travi di ferru e pilastri
di cimentu, sdirrubbati,
a scavàriti, ccu li to' stissi manu,
tombi d' abbissi dintra lu cori
addivintatu sùvuru.
Vogghiu arrubbari ccu l' àlitu
lampi e saitti a li timpesti
pi fari lanci
e spati
e scuti
e cori
pi fabbricari
strati
di libbirtà e di paci.