'ASCARU (poesia di Turi Lima)

ÀSCARU
La furia di li sèculi
ti detti sempri l' aggiu di tradiri
e a ogni lazzaruni
chi ccà ha vinutu ccu la spata a manu
tu ci ha' datu na manu
a tinìrini stritti a li catini.
Gridasti viva lu libiraturi,
ma lu libiraturi era un tirannu
ca ni scurciava l' ossa,
lu pani ni luvava,
li figghi n' ammazzava,
e ni nzultava
e schiavi munnu munnu ni purtava.
Ma di la vucca to nisceva viva
e viva ci dicisti a li finici,
e viva ci dicisti a li rumani,
viva a li grechi e viva a li nurmanni,
viva a spagnoli e viva a li burbuni
e viva gridi ancora a li taliani.
Pi tia è sempri viva lu duluri,
pirchì tu, ccu lu sangu di sta genti,
guadagni li to' glori
e non t' importa di cu' mori mori.
Tu si' la mala razza di sta terra,
nata ccu lu fumeri di cavaddi
di tutti l' assassini
c' hannu sbarcatu cca pi turmintari,
di tutti l' assassini
c' hannu vinutu cca pi ni sfruttari.
Àscaru, tu si' peggiu di li cani,
c' allicchi pedi a tutti li straneri
e pi un pezzu di pani
ti vinni la Sicilia e to muggheri.
Tu si' un vermi di fogna senza cori
pirchì non senti n-pettu nuddu amuri
pi sta genti ca soffri ha di tant' anni
senza nudda spiranza,
mentri tu pensi sulu a la to panza.
Eppuru tu cumanni,
giri a cavaddu e fai la vuci grossa
e si sta genti parra o s' arribbella,
si' bonu di spaccàrici lu cori
ccu l' arma ca ti duna lu patruni.
Àscaru,
tu si' peggiu di Cainu
e ju ti malidicu sanu sanu,
pirchì non hai cuscenza e sintimenti.
Ma veni un jornu ca st' afflitta genti
ti scafazza la testa,
nfinalmenti.

Turi Lima